ଅନୁଗୋଳ ୩୦।୭- ଅନୁଗୋଳ ସହର ଉପକଣ୍ଠରେ ଅବସ୍ଥିତ ଓ.ପି. ଜିନ୍ଦଲ ସ୍କୁଲ ପକ୍ଷରୁ ଜିନ୍ଦଲ ନଗର ସ୍ଥିତ ଇଡେନ ଗାର୍ଡେନ ଠାରେ ବେଶ ଉତ୍ସାହର ସହିତ ପଦାଭିଷିକ୍ତ ବା ପଦବୀ ଗ୍ରହଣ ଉତ୍ସବ ଅନୁଷ୍ଠିତ ହୋଇଯାଇଛି ।ପାରମ୍ପରିକ ପ୍ରଦୀପ ପ୍ରଜ୍ଜ୍ୱଳନ ସହିତ ଏହି ପଦବୀ ଗ୍ରହଣ ଉତ୍ସବ ସମାରୋହ ଆରମ୍ଭ ହୋଇଥିଲା। ଏହା ପରେ ପ୍ରଧାନଶିକ୍ଷକ ଡକ୍ଟର ଅଶ୍ୱିନୀ କୁମାର ସାହୁ ସ୍ୱାଗତ ଭାଷଣ ରଖିଥିଲେ। ଏହି ଅବସରରେ ମୁଖ୍ୟ ଅତିଥି ଭାବରେ ଜିନ୍ଦଲ ଷ୍ଟିଲର ସଭାପତି ତଥା ସିଏଚ୍ଆରଓ ଦିଲୀପ କୁମାର ସିହ୍ନା ଯୋଗ ଦେଇ ଦାୟିତ୍ୱବୋଧକୁ ବିକଶିତ କରିବା ଉପରେ ଆଲୋକପାତ କରିଥିଲେ। ଆହ୍ବାନପୂର୍ଣ୍ଣ ସମୟରେ ଏହି ଦାୟିତ୍ୱବୋଧ ମାର୍ଗଦର୍ଶକ ଭାବରେ କାର୍ଯ୍ୟ କରିଥାଏ । ଯେତେବେଳେ ବ୍ୟକ୍ତିମାନେ ସଚ୍ଚୋଟତା, ସହାନୁଭୂତି ଏବଂ ସାମୂହିକ ପ୍ରଗତି ପାଇଁ ଅଟଳ ପ୍ରତିବଦ୍ଧତାର ସହିତ ସେମାନଙ୍କର କର୍ତ୍ତବ୍ୟ ପାଳନ କରନ୍ତି, ସେତେବେଳେ ପ୍ରକୃତ ନେତୃତ୍ୱର ଉଦୟ ହୁଏ ବୋଲି ପ୍ରକାଶ କରିଥିଲେ । ସମ୍ମାନିତ ଅତିଥି ଭାବରେ ସୁରକ୍ଷା ମୁଖ୍ୟ (ଏସ୍ଏଫ୍ଏସଏସ) ବ୍ରିଗେଡିୟର (ଅବସରପ୍ରାପ୍ତ) ଦିନେଶ ଶର୍ମା ଯୋଗଦେଇ ଚରିତ୍ରର ମୂଳଦୁଆ ଭାବରେ ସଚ୍ଚୋଟତାକୁ ଗୁରୁତ୍ୱ ଦେଇଥିଲେ।
କାର୍ଯ୍ୟକ୍ରମରେ ନବନିଯୁକ୍ତ ଛାତ୍ର ନେତାମାନଙ୍କୁ ବ୍ୟାଜ୍ ଦେଇ ସମ୍ମାନିତ କରାଯାଇଥିଲା। ସେହିପରି ନିକଟରେ ଅନୁଷ୍ଠିତ ଏକ ତାଲିମ ଶିବିରରେ ଉଲ୍ଲେଖନୀୟ ପ୍ରଦର୍ଶନ କରିଥିବା ଏନସିସି କ୍ୟାଡେଟମାନଙ୍କୁ ସ୍ୱୀକୃତି ଦିଆଯାଇଥିଲା। ହେଡ୍ ବୟ ଏବଂ ହେଡ୍ ଗାର୍ଲଙ୍କ ଦ୍ୱାରା ହୃଦୟସ୍ପର୍ଶୀ ଧନ୍ୟବାଦ ପ୍ରଦାନ ସହିତ ସମାରୋହ ଶେଷ ହୋଇଥିଲା। ଏହି ଅବସରରେ ଉପାଧ୍ୟକ୍ଷ ଡକ୍ଟର ଅରୁଣ କୁମାର ଦାଶ, ପ୍ରଶାସକ ଶ୍ରୀ ସୌମ୍ୟା ବାନାର୍ଜୀ ଏବଂ ବରିଷ୍ଠ ଶିକ୍ଷୟିତ୍ରୀମାନେ ଉପସ୍ଥିତ ଥିଲେ। ଏହି କାର୍ଯ୍ୟକ୍ରମକୁ ଉତ୍ସାହୀ ଛାତ୍ରମାନଙ୍କ ଏକ ଗୋଷ୍ଠୀ ଦ୍ୱାରା ସୁରୁଖୁରୁରେ ପରିଚାଳନା କରାଯାଇଥିଲା।
