ଅନୁଗୋଳ ୨୨୲୧୧ – ଘଂଚ ଜଂଗଲ, ସମୃଦ୍ଧ ଜୈବବିବିଧତା, ମହାନଦୀରେ ଦୁର୍ଲଭ ଗଣ୍ଡ ଏବଂ ବିରଳ ଘଡିଆଳ କୁମ୍ଭୀର ପାଇଁ ସାତକୋଶିଆ ଅଭୟାରଣ୍ଯ ସାରା ପୃଥିବୀ ପ୍ରସିଦ୍ଧ । ଦେଶ ବିଦେଶର ପ୍ରକୃତି ପ୍ରେମୀ, ବନ୍ଯପ୍ରାଣୀ ବିଶେଷଜ୍ଞ ଏବଂ ଜଂଗଲ ଗବେଷକ ମାନେ ନିଜର ରିସର୍ଚ୍ଚ, ସର୍ଭେ ଏବଂ ଅଧ୍ଯୟନ ପାଇଁ ସାତକୋଶିଆକୁ ଅଧିକ ପସନ୍ଦ କରିଥାନ୍ତି । ପର୍ଯ୍ଯଟକ ମାନେ ସାତକୋଶିଆର ନୌସର୍ଗୀକ ଶୋଭା ସମ୍ପଦରେ ଆକୃଷ୍ଟ ହୋଇ ବର୍ଷସାରା ସାତକୋଶିଆକୁ ପରିଭ୍ରମଣରେ ଆସିଥାନ୍ତି । ସାତକୋଶିଆ ଅଭୟାରଣ୍ଯ ଅନୁଗୋଳ ଜିଲ୍ଲାର ଗର୍ବଗୌରବ । ଏଣୁ ସାତକୋଶିଆ ସମ୍ବନ୍ଧରେ ଅନେକ ଅଜଣା କଥା ଜିଲ୍ଲାର ଛାତ୍ରଛାତ୍ରୀ ମାନେ ଜାଣିବା ଆବଶ୍ଯକ ମଣି ସାମାଜିକ ଅନୁଷ୍ଠାନ “ସାଥୀ ପରିବାର” ପକ୍ଷରୁ “ସିକ୍ରେଟ୍ସ ଅଫ୍ ସାତକୋଶିଆ” ନାମରେ ଏକ ନୂଆ ଜଂଗଲଧର୍ମୀ କାର୍ଯ୍ଯକ୍ରମ ଅଭିଯାନ ଆରମ୍ଭ କରିଯାଇଅଛି । ଅଭିଯାନର ପ୍ରଥମ କାର୍ଯ୍ଯକ୍ରମ ସହର ଉପକଣ୍ଠ ହୁଲୁରିସିଂହା ହାଇସ୍କୁଲରେ ଅନୁଷ୍ଠିତ ହୋଇଛି । ବିଦ୍ଯାଳୟର ପ୍ରଧାନ ଶିକ୍ଷକ କୀର୍ତ୍ତନ ସାହୁ କାର୍ଯ୍ଯକ୍ରମରେ ସଭାପତିତ୍ବ କରିଥିବାବେଳେ ଅନୁଷ୍ଠାନ ତରଫରୁ ସୁବ୍ରତ କୁମାର ପ୍ରଧାନ ଏବଂ ବିଦ୍ଯାଳୟର ସହକାରୀ ଶିକ୍ଷକ ମଦନ କୁମାର ନନ୍ଦ, ଶଂକର କୁମାର କର, ସନ୍ତୋଷ କୁମାର ମହାପାତ୍ର, ପ୍ରତାପରୁଦ୍ର ପ୍ରଧାନ, ସହକାରୀ ଶିକ୍ଷୟତ୍ରୀ ସୁମିତ୍ରା ନାୟକ, ଅଭିପ୍ସା ମାନସିଂହ, ସୂର୍ଯ୍ଯକାନ୍ତି ଶତପଥୀ, ଅଂଜନା ମହାନନ୍ଦ ପ୍ରମୁଖ ଅତିଥି ଭାବେ ଯୋଗ ଦେଇ ସାତକୋଶିଆ ଅଭୟାରଣ୍ଯର ଭୌଗଳିକ ଅବସ୍ଥିତି, ସ୍ତନ୍ଯପାୟୀ ପ୍ରାଣୀ, ପକ୍ଷୀ ପ୍ରଜାତି, ମାଛ ବଂଶ, ସରୀସୃପ, ବୃକ୍ଷରାଜି ସମ୍ବନ୍ଧରେ ଛାତ୍ରଛାତ୍ରୀଂକୁ ଜଣାଇଥିଲେ । ଅଭୟାରଣ୍ଯର ଇତିହାସ, ଗଠନ, କିଛି ବର୍ଷ ପୂର୍ବରୁ ସାତକୋଶିଆରେ ଅନେକ ସଂଖ୍ଯାରେ ମହାବଳ ବାଘ ଥିବା ଘଟଣା ଏବଂ ସାତକୋଶିଆ ହେଉଛି ଓଡିଶାର ଏକମାତ୍ର ସ୍ଥାନ ଯେଉଁଠି ବିରଳ ଘଡିଆଳ କୁମ୍ଭୀର ପ୍ରାକୃତିକ ବାସସ୍ଥାନରେ ବିଚରଣ କରନ୍ତି, ଏ ସମସ୍ତ ବିଷୟରେ ଜାଣି ଛାତ୍ରଛାତ୍ରୀ ମାନେ ବହୁତ ଉତ୍ସାହିତ ହୋଇଥିଲେ । ମହାନଦୀରେ ସାତକୋଶିଆ ଗଣ୍ଡ ସୃଷ୍ଟି ହେବା ଏକ ଦୁର୍ଲଭ ପ୍ରସଂଗ ଜାଣି ଛାତ୍ରଛାତ୍ରୀ ମାନେ ଗର୍ବ ଅନୁଭବ କରିଥିଲେ । ଭବିଷ୍ଯତରେ ଉଚ୍ଚଶିକ୍ଷା ଲାଭ କରି ଏବଂ ନିଜକୁ ପ୍ରକୃତି ପ୍ରେମୀ ଏବଂ ପରିବେଶ କର୍ମୀ ରୂପେ ଗଢି ସାତକୋଶିଆ ଜୈବବିବିଧତାର ସୁରକ୍ଷା ଓ ସଂରକ୍ଷଣ କରିବାକୁ ଛାତ୍ରଛାତ୍ରୀମାନେ ଆଗ୍ରହ ପ୍ରକାଶ କରିଥିଲେ । ଆଗକୁ ଜିଲ୍ଲାର ଅନ୍ଯ ହାଇସ୍କୁଲ ଗୁଡିକରେ ଏହି କାର୍ଯ୍ଯକ୍ରମ କରାଯାଇ ସାତକୋଶିଆ ସହ ଜିଲ୍ଲାର ଛାତ୍ରଛାତ୍ରୀଂକୁ ଯୋଡିବାକୁ ଅନୁଷ୍ଠାନ ପକ୍ଷରୁ ନିଷ୍ପତ୍ତି ହୋଇଥିବା ନେଇ ଅନୁଷ୍ଠାନର ପିଣ୍ଟୁ ବେହେରା ପ୍ରକାଶ କରିଛନ୍ତି । ହୁଲୁରିସିଂହା ଉଚ୍ଚ ବିଦ୍ଯାଳୟର କର୍ମକର୍ତ୍ତାଂକ ସହଯୋଗରେ କାର୍ଯ୍ଯକ୍ରମ ଅନୁଷ୍ଠିତ ହୋଇଥିଲା ।
